مولى يويو مايا..................ولسه مخلصتش

على فكرة

دى مش لعبه جديدة اسمها مولى يويو مايا

لا دول اسامى صحابى اللى انا شفتهم امبارح

حتقولولى و عملتى ايه النهاردة

حرد و اقول انى بكتب البوست دة الساعه 4 الفجر من اليوم الجديد

المهم المهم

اول امبارح لاقيت مولى صحبتى بتتصل بيا

و كان الحوار كلاتى:احم احم

مولى:ازيك يا سمورى عامله ايه؟

انا (وبلا فخر):الحمد لله و انتى اختى ايه اخبارك؟

مولى :تمام الحمد لله

بقولك ايه انتى فاضيه بكرة

انا (بفكر):اممممممممممممم اه بس مش كل اليوم يعنى

مولى:طيب احنا جينلك بكرة(بتتكلم عليها هى و يويو) هه

انا :تعالى اختى تانسى و تشرفى دة البيت حينور

حتيجوا على امتى ؟

مولى:بعد الفطار

انا :يعنى الصبح

طب على كام

مولى:يعنى على 10 او 11 كدة

و متعمليش حسابك على فطار او غدا عشان متعديش تصوتى عشان ناكل

انا بقولك اهوه

انا :طيب طيب

انشاءالله عنكم ما تفحطوا

بس اعملوا حسابكم حتيجوا تلاقونى نايمه ابقوا صحونى بقه و ابقول اعملوا حسابى فى الفطار اللى حتفطروا منه ماشى

مولى: امشى يا بت

و خلصت المكالمه على كدة(دة المفروض يعنى) احم احم

شويه و لاقيت التليفون بيرن تانى

انا:الو

مولى: بقولك ايه كنسلى بكرة

انا : ليه اختى؟

مولى:عشان الزفته مش عارفه عندها ايه ؟

اهى حاجه خايبه زيها كدة

انا:البت دى بردة(بنتكلم على يويو طبعا)هه

طب بقولك ايه ما اجيلك انا بكرة

مولى:اوى ماشى يا ريت

انا :بس اعملى حسابك على غدا

مولى : شكلك داخله على طمع

انا :ههههههههههههههههههههه

خلاص بكرة ان شاء الله

مولى:اوك

انا:سلاموزا

مولى:سلاموزا

المهم طبعا انا المفروض انا خلصت المكالمه على كدة و المفروض ان كان فى نفس اليوم انزل مع مايا بس بالليل مش العصر يعنى

فانا دخلت نمت اليوم دة على الساعه 5 الفجر كدة

صحيت على صوت بابا و هو بيقولى قومى كلمى مولى على التليفون

مولى ايه بس هو انا لحقت انام ايه البت البردة دى

فبصيت فى الساعه لاقيتها 3و نص العصر تانى يوممممممممم

روحت نطيت من على السرير و انا مش قادرة عايزة انام

رديت عليها

انا:ايوة يا مولى

مولى : ايه يا بت حتيجى امتى؟

انا: ما تكنسلى النهاردة و خليها بكرة عشان مش قادرة

مولى:و حياه امك انا طلبتلك الاكل و حضرت كل حاجه قومى البسى الله يحرقك

انا: هو انتى طلبتى ايه ؟

مولى:سمك

انا : حمامه يا امل انا حلبس و انزلك على طول بس حضرى الاكل اوك سلام

و قمت لبست زى الصاروخ و خدت السكه جرى و روحت ركبت الرتام و عماله ادعى الحق اروح قبل ما يخلصوا الاكل

الخوف كله من مولى

دى اسد ما شاء الله

و رغم كدة مش بيبان عليها

هى ارفع واحد فينا فى الثلاثى بتاعنا

سبحان الله

يوضع سره فى اهبل خلقه

المهم وصلت و قعدت

فين الاكل يا طنط

ثوانى بس ماما بتعمل الرز

الله يحرقك

المهم قعدنا نتكلم كدة انا و هى و يويو حوالى ساعه الا ربع و حكيتلهم شويه حاجت عنى من اخر مرة مشفتهومش فيها

و اخر تطورات حياتى

و هما قعدوا يهزروا و قعدنا نضرب فى بعض شويه

و نتعارك حبيتين

المهم

يا بنتى ام الرز دة امك بتصنعه ولا ايه؟

قالتلى استنى

شويه و الاكل جه و كان عبارة عم سمك مشوى و رز احمر و بس

و صدقونى هذا يكفى

المهم كلت

و قولتلها هاتيلى التليفون عايزة اعمل الوووووووووو

خدت التليفون و كلمت مايا

انا:ايه يا مايا ايه النظام؟

مايا:انتى فين ؟ انتى لسه مروحتيش؟

انا:لا انا حقابلك على طول مش حروح و انزلك تانى

اه صحيح انتى اتغديتى يا مايا؟

مايا:لا مستنيه اتغدى معاكى

انا:لا كلى يا ماما عشان كنت معزومه على سمك و صحابى قعدوا يتحيلوا عليا عشان اكل معاهم فانا مرديتش ازعله يعنى ماشى؟

مايا: بقه كدة ماشى متشربيش حاجه نشرب مع بعض اوك؟

انا:لا تقلقى حشرب هنا و اشرب معاكى عادى يعنى

مايا:اه اصل انتى معدتك صغننه اوى متتاخريش

انا:اوكى اختى يلا سلاموزا

و طبعا قبل ما اقفل ظبطت المعادو المكان

و نزلتلها

و قعدنا شويه على محطه الرتام و بعد كدة روحنا على شارع

خـــــــــــــــــــــــــــــــالد ابن الوليـــــــــــــــــــــــــــــــــــد

و اشتريت خاتم من هناك

و شربت تمر هندى اللى بعشقه موووووووووووووووووووووت

و اتمشينا لحد جامع سيدى بشر

و قعدنا قدام الجامع شويه

و بعد كدة روحت وصلتها عشان تركب تروح

و انا اتمشيت لحد بيتنا

و خلاص على كدة

ختلى كلمتين عشان دخلت الساعه 10 و ان المفروض اروح من الساعه 8

بس عادى يعنى كله بيطلع فى الغسيل

و بعدين كان فى موضوع اهم كان شاغل بالى

فتقريبا مكنتش سامعه الكلام اللى بيتقالى

بس اشطه يعنى

و دمتــــــــــــــــــــــــــــــــــــــــــــــــــــــــــــــــــــــــــــــــــــــــــــم