Monday, April 9, 2012

Falling


أنا إقتنعت دلوقتى انك لازم تتغير عشان البنى أدم اللى بتحبه ... بس فى وجه اخر للعملة .. ان الطرف التانى ميحسش بالتغيير او ميقدروش ... فى الحالة دى الواحد بيكون فى حيرة كبيرة من إنه يكمل و يحاول يغير من نفسه و لا يثبت على حاله و ميهموش .. مش قادرة أقرر فعلا ...
و مش عارفة أروح لمين عشان يساعدنى ... حاسة انه كله فيه اللى مكفيه ... و حرام أشيل حد همى .. مع إنه ممكن يكون مش هم بالنسبة لناس كتير و حاجة هايفة .. بس بالنسبالى دى حاجة كبيرة
لما تقرر تغير من طباعك و إسلوبك عشان شخص بتحبه ... دى حاجة كبيرة أوى و مش سهلة ... و بتبقى أصعب لو كان هو مش حاسس و مش بيقدر و أصلا مش شايف نفسه غلطان
و انا ملقيتش حد اتكلم معاه فقلت أروح اكتب اللى فى بالى فى المدونة بتاعتى حبيبتى  .. وحشتينى أوى يا مدونتى ...
الناس كلها دلوقتى على الفيس بوك و تويتر ... نسيوا المدونات ...
إحتمال كبير محدش يرد عليا و لا ينصحنى ... بس برده أدينى قلت اللى جوايا .... رغم انه محدش سمعنى و لا حاسس ... يمكن الفضفضة دى تريح بالى شوية


Monday, March 28, 2011

ربنا يكتبهالنا


بقالى كتير مدخلتش و كتبت هنا اللى بحب أقوله، بس دلوقتى فى كلام كتير عايزة أفضفض بيه
اكيد الناس كلها نسيت دلوقتى الاحداث الى عدت عشان ربنا كرمنا بنعمة النسيان و يا بختنا
بس انا حابة اقول انى منسيتش الاحداث بأى شكل
و أحب أقول و بكل فخر
ان فى عائلتى شهيد من شهداء ثورة 25 يناير
اسمه
الشهيد أحمد كمال
و هو يبقالى ابن عمى و كان عنده 19 سنة و فى كلية هندسة سنة تانية مدنى
اللى حصل مع احمد يوم جمعة الغضب و بإختصار شديد
انة كان فى مظاهرة قريب من قسم شرطة مش متذكرة إسمه و بدأ الظباط برمى القنابل المسيلة للدموع
طبعا الناس بدات تجرى و بداوا يخبطوا فى بعض و احمد الله يرحمه طلع يجرى و قلع التى شيرت بتاعه و غطى القنبلة و حطها على جنب و صحابه قعدوا ينادوا عليه ارجع يا احمد إرجع يا أحمد بس و بعد راحلهم و حس ان فى ميه ماشية فى جسمه و كانت نتيجة رصاصة جت من ضهره فى الرئة الشمال يعنى إتاخد غدر و صحابة خدوه على المستشفى يوم الجمعة بالليل
و اتوفى هناك فى المستشفى
بس كان بسم الله ما شاء الله عليه مبتسم و بيهزر و بيطمن اللى حوالية من اهله
الله يرحمه هو و جميع الشهداء اللى زيوه اللى يا رب الناس متنساهومش و متنساش ان اللى زيهم و اللى فضلوا قاعدين فى ميدان التحرير هما اللى ادولنا الفرصة ان احنا منخافش و كل واحد يقول رأيه بصراحة و بدون خوف
و خلى كل الناس النايمة تنزل و تدى صوتها فى تعديلات الدستور
يا ريت الناس متنساش فضل الشهداء دول علينا
دول مش راحوا اتخانقوا بدون هدف دول دفعوا أرواحهم عشان احنا نلاقى الفرصة ان احنا نعيش بكرامة و منسكتش على حقنا بعد كدة
انا معرفش أحمد يكون حاسس بينا و لا دلوقتى بس عايزة أقوله
وحشتنا اوى يا احمد و دمك مرحش هدر يا غالى
و يوم فرحتنا انا زغردتلك يا احمد
و انت كنت طول عمرك راجل يا احمد و استحقيييت فعلا الشهادة
ان شاء الله تكون كويس
ربنا يغفرلك يا احمد
و ان شاء الله نحصلك قريب يا ابن عمى
إدعوله بالمغفرة و الرحمة و أحلى جنات ربنا
يا رب اكتبلنا الشهادة يا رب
http://www.facebook.com/home.php?sk=group_162304067153970&ap=1ا

و دمتم

Sunday, October 31, 2010

أكيييييييييييييييييييييد حتفهموا انا اصدى اية؟

كنت بجد مرعوبة و مازلت مرعوبة ان الموضوع ميتمش
او ان قلبى يتكسر
و محدش عارف النصيب فين
بس الحمد لله تم الاتفاق و ان شاء الله كله يبقى تمام
ادعولى ربنا يتمملى على خير

Saturday, November 14, 2009

مبــــــــــــــــــــروووووووووووك لمصر



بجد كنا محتاجين حاجة تفرحنا




أى حاجة




و الماتش دة فرح مصر كلها




كبير و صغير




بنت او ولد




مسلم او مسيحى




يا رب ديم علينا الفرحة دى






مبروك لشعب مصر اللى بقالنا كتير اوى مشوفنهوش كدة




مبرووووووك




يا بـــــــــــــــــــــــــــــــــــــــــــــــــــلــدى

Monday, August 17, 2009

لون جديد


كل يوم اقلب فى التليفزيون أو التلفاز ألاقى إعلانات الافلام الجديدة

مش عارفة مين قتل مين

و قصة سفاح مصبريه

و التشاؤم و القرف الموجودين فى مصر

و المشاكل و المصايب و الكوارث و ال و ال

و اللهى دماغى لفت

الله يخربيت الافلام على اللى عايز يمثل على اللى عايز يتفرج اصلا


شوية و جة إعلان فيلم احمد مكى

و سمعت الاغنية

يا إخوانا انا اتخنقت من اغانى المصرى الراب مش كفاية تامر حسنى ال مش عارف يغنى لوحده مستورد ناس تغنى معاه

أحيه و أيوووووووووه

و طنشت بردوه الاغنية

تانى يوم اخويا عمال يغنى

اغنية ايه دى يا حمادة

قالى تعالى اسمعى أغنية انما ايه اوفزى اوفزى


يا راجل


و ماله يا خويا و رينى الافوزى دة نوع جديد من الاغانى

لاقيتها أغنية الحج احمد مكى الجديدة دور بنفسك

بعد مسمعتها كذا مرة قلت اتفرج على الفيلم بقة

كان تصوير سينما بس استحملته عشان اعرف ايه دور بنفسك لية يعنى عشان ايه مش فاهمة

و عرفت

بجد احمد مكى من النجوم الاوائل دلوقتى و اللى تحس انه فعلا عرف يقرب للشباب بطريقة يعنى

هو مثلا شاب روش طحن و عايش حياته بس اهم حاجة مش ناسى اصله

و دة كان واضح جدا فى فيلمينه

بيأكد على الذات و ايه اللى ممكنه تعملة فى جو مرح و جميل و رومانسى

دة ممثل انا ممكن اضحى و اتفرجله على فيلم تصوير سينما


و اللى زاد و غطى الاغنية الجامدة دور بنفسك جوه نفسك

بجد رائعة و كلامها من رائيى بيخاطب كل شاب و فعلا اتكلم بشكل جذاب عن المشاكل المختلفة اللى بتقابلنا

فى طبع و فى صحاب و فى الحب

و ان الواحد لما يرضى باللى ربنا قاسمهوله

بجد بيرتاح و ربنا بيكرمه اكتر و اكتر

ربنا بيحب عباده بيحبهم اوى و بيقدملهم الخير دايما

حتى لو كان قليل

بس فى النهاية دة خير ربنا علينا

و الرضى بيه حاجة كبيرة اوى


ربنا يكرمنا و يجعلنا راضيين يا رب

اللهم آمين



انا حخبط لينك الاغنية للى يحب يسمعها




و اللى يحب ينزل الكليب يقولى و انا احط اللينك فى المقال الاخير دة


كل سنة و انتى طيبين


و دمتــــــــــــــــــــــــــــم سالمين



Wednesday, July 1, 2009

ساموراى أو سوسو أو أى حاجة بس اخيرا رجعت بالسلامة


احب اقولكم انى و بلا فخر إستطعت ان أحقق انجازا لم يستطع الاخرون الوصول إليه

و لكنى وصلت إليه و بسهولة

لقد حجزت مقعد فى الصف الأمامى على قهوة العاطلين

و بجدارة

أنا إتخرجت يا ناس يا هو ، خلاص خلصت من التعليم و سنينة

بعد 17 سنة أشغال شاقة ، إحم أصدى17 سنة تعليم أخيرا إتخرجت و محدش ليه عندى حاجة

أصحى و انام براحتى مفيش مدرس ليه كلمة عليا

الله يمسيكى بالخير يا اختى امينة

و لكن يا أصدقائى الأعزاء هيهات يا ولدى هيهات

لم يغمض لى جفن

بصراحة انا استمتعت بالراحة اللى كانت بعد الامتحانات و الهم الهائل اللى كان على صدرى إنزاح

بس بعد يوم واحد كان فى هم أكبر بكتير ، ألا و هو الملل

أجل الملل

انا عمرى مكنت بحب شغل البيت و التنضيف و الذى منه

تانى يوم قمت غسلت الاطباق و دورت فى التلاجة على اطباق اغسلها و طبقت الغسيل و دورت على غسيل اغسلة

كنست و مسحت و فلترت أوضتى

اينعم هى سدت حاجة لوقت مؤقت ، بس انا اصلا مش بعز شغل البيت ، و الكمبيوتر عندى كان فى العناية المركزة

و التليفزيون مش بعزه أوى

طلعت اجرى على مكتبة روايات الشباب الشهيرة بمنطقة صفر بالاسكندرية ، لعلى أجد لديهم ما يسد حاجتى

و لقد ابهرتنى التجديدات ، ففى الاول كان لكل واحد من مرتادى المكتبة صفحة برقم فى كراسة ما لديهم

و صورة البطاقة و رقم هاتف المنزل و الموبايل و ذلك لدواعى الاستعارة و غيره

أما الأن تحولت تلك الكراسة لصفحة داتا على الكمبيوتر على برنامج الاكسيس

و طلب منى رقم هاتف المنزل و الموبايل و انه بعد المعاد المحدد لإرجاع الكتاب المستعار إذا لم ارجع الكتاب

سوف يبعث لى برسالة على الموبايل تذكرنى بالمعاد و هكذا ثلاث مرات

فإذا لم ارجع الكتاب فى حدود شهر فإنه يتصل بالمنزل ليستعلم

بصراحة عجبنى النظام الجديد

و حسسنى بالحياة معرفش لية

بعد الملل اللى كنت فيه بس الحمد لله يعنى

خدتلى حوالى كتابين على أد الميزانية مش قولنا قهوة عاطلين يبقى محدش يسأل

ربنا يكرمه الحاج بقة

و روحت البيت و انا سعيدة جدا بالكتابين و كانوا من الأدب الساخر الحديث من وجهة نظرى

بس وجهات النظر فيها جديدة حسيت ان بيتعرض فيها كلامنا العادى اللى ممكن اقوله بينى و بين صحابى بس بطريقة منظمة و مفسرة

اللى فكر و جرب يقول أو قال فعلا حيفهم الكلام اللى مكتوب

انما لو حد من إياهم علىرأى القائل فى فيلم الكباب و الهباب

" ربنا لا تؤاخذنا بم فعل السفهاء منا "

أهم بقة هما السفهاء دول هم اللى مش حيفهموا الكلام

دى كانت مرحلة بعد مرحلة الامتحانات اللى حكايتها حكاية

و لسة فى حكاية دورانى المجنون على المدارس و مدى العجائب و الغرائب التى قابلتها فى هذا الشأن

و لا موسوعة جينيس للعجائب و الغرائب

و للحديث بقية

و على رأى الإعلامى الكبير

سيد أبو حفيظة

فتوكم بالعافية


Friday, February 20, 2009

السلحفاه الزرقاء


كنوع من انواع التوفير و بم ان الاسعار فى الارتفاع الدائم فقد تقرر انى لازم اعمل لنفسى ميزانيه خاصه لاخرج عنها

و الميزانيه هى أن لا ميزانيه

بمعنى

إنى حوفر اللى اقدر عليه و الاقتصاد فى النفقات

يعنى مش لازم كبايه الحاجه الساقعه و أجيب الاكل معايا من البيت و لو حبيت اكل حاجه حلوة

كفاية بسكوت لمبادا و مالو انا موافقه

و ايضا المواصلات لازم الواحد يوفر فى المواصلات و بابا عاملى اشتراك ترام خلاص حركب بيه كفايه ميكروباصات

خلص يوم فى الكليه و بدات انفذ الاستراتيجيه الخطيرة دى و روحت اركب ترام وقفت على المحطه نص ساعه و وقتها كانت المدارس طالعه و العيال التلاميذ يعنى عمالين يجروا زى العفاريت و يشتموا فى بعض و يزقوا بعض على شريط الترام

نوع من انواع التحدى يعنى

تلاميذ بقه

المهم الترام جاى من بعيد يدنجل طبعا مفيش مكان اعد لا كراسى و لا على السلم حتى

و الجمال مفيش مكان اقف

هو جاى مليان اصلا

مش عارفه اقف و انا معايا اشتراك مش بقلق انى الكمسرى يعدى و انا مدفعش انا و بلا فخر معايا اشتراك

أة احنا ناس مهمه يعنى

مش بتوع تذاكر

بس عجبنى اوى الابتكار الاخير فى موضوع الترام و اللى كان لازم يحصل من زمان

عربه السيدات و اللى بيركب فيها سيدات فقط واضح من اسمها يعنى

بقه أول عربيه

فى الاول كانت العربيه اللى فى النص

و الترام كله على بعضه مكون من تلت عربيات

و العربيه الاولانيه و الاخيرة مشتركه

دى كانت كارثه بصراحه و فى كذا حاجه من ناحيه شكل واقفه و ركوب و نزول و مشى على المحطه نفسها

لأن مش كل الناس كويسين و مش كل الناس كبار فى العقل اصدى مش فى السن

فبتحصل مشاكل كتير انتوا اكيد عارفنها بدون ذكر

لما خلوا العربيه الاولانيه سيدات بس بقى الموضوع اسهل

سيدات بس اللى بيبقوا واقفين فى اول المحطه و احنا اول ناس يعتبر بتنزل على محطه الترام و بتمشى بسرعه من عليها

يعنى زودت الأمان شويه

بس هى هى نفس الزحمه و القرف

و اختلاف الطبقات

يااااااااااااااااااااااااااااااااااااااااااه

ممكن تشوف ناس عجب فعلا فى الترام دة

يعتبر ارخص مواصله فيكى يا اسكندريه و اقل حد ممكن يركبه الاجره ب 25قرش فقط لا غير

تلاقى فلاحين و تلاقى متمدنين

تلاقى طبقه ارستقراطيه و طبقه متوسطه و طبقه أقل من المتوسط

تلاقى المصريين و تلاقى الاجانب

و جميع اشكال الاطفال و مش حوصف

بس

فأنا ركبت هذه المواصله الساحره و اللى للأسف ناويه أواظب على ركوبها كنوع من التوفير

بس الركوبه دى ليها عيوبها القهريه

البطء ثم البطء ثم البطء ثم البطء

بس بصراحه هى بتبقى على حسب السواق فى سواقين يبقوا موسطنين العمليه

لا سريع اوى و لا بطىء اوى

انما فى سواقين استغفر الله ممكن ياخد ساعه فى سكه تاخد نص ساعه

و فى سواقين ممكن تاخد 10 ق فى سكه تاخد نص ساعه برضه

فالسحلفاه الزرقاء دى حظووووووووووظ

يا إما يبقى فهد يا إما سلحفاه يا إما يبقى حصان

تلت انواع بالظبط زى تلت عربيات

بتحصل حكايات كتيرة اوى فى الترام دة منها المضحك و منها اللى فيه موعظه و منها اللى يخليك تنط منه و تنفد بحياتك

بس يعتبر علامه مميزة لمدينه الاسكندرية

فى اسكندرية من غير الترام الزرقا

معتقدش



و دمتــــــــــــــــــــــــــــــــــــــــــــــــــــــــــــــــم

Thursday, February 12, 2009

باك تو سكول


بكرة بدايه التيرم التانى و أجازة نص السنه تخلص النهاردة و انا مريحتش فيها خالص

انا يادوبك خلصت امتحانات نص السنه و لسه يادوب بقول يا هادى حريح بقه و انزل كل يومين كدة اتمشى شويه على البحر

أو اروح بحرى و اكل فطيرة بالسكر و سندوتشين كبده

و اللهى كان حلم جميل جدا

اللى حصل ان تقريبا بعد يومين من الاجازة جالى تليفون من الكورس اللى باخد فيه أى سى دى إل

و فحواه انى لازم اروح اخلص الامتحانات فى خلال اسبوعين و إلا المنحه حتتلغى

طول فترة الاجازة و انا عماله أذاكر و مش بنام و اروح امتحن

و الكارثة بقه

احجز مثلا الساعه 4 ادخل الامتحان الساعه 5 و نص او 6

يعنى اروح فى معادى و اتلطع هناك ساعتين

و معاهد كتير بقه بتمتحن هناك و ناس كتير اوى اوى أصل وزارة الاتصالات اللى مديه المنحه للعالم اللى زييى عايزه تخلص

تعمل ايه بقه

جمعت كل الناس اللى فى المعاهد اللى المفروض يمتحنوا فى حته واحدة و هى المنطقة الشمالية بالاسكندرية

كل الناس جيه من جميع معاهدك يا اسكندرية و بتمتحن فى نفس المكان

تخيلوا الزحمه و الهرجله و التأخير و تعب الاعصاب لأن النتيجه بتظهر فى ساعتها و بتبقى طالع من الامتحان عارف

انت ناجح و لا ساقط

و انا لسة مخلصه امتحانات امبارح و بقول استريح بقة و أنام حبة كدة

أكتشف إكتشاف رهيب

بكرة مع الأسف الشديد أول يوم فى التيرم التانى

أواه يا قلبى

و إكتشفت برضه ان بكرة الفلانتين

قلت الحمد لله

قضا أخف من قضا

اهو الواحد حيلاقى حاجه يسلى بيها نفسه

و بمناسبه التيرم التانى اتمنى لنفسى و لكم النجاح و التوفيق

يا رب ألاقى وقت أدون فيه

دعواكم

و دمتـــــــــــــــــــــــــــــــــــــــــــــــــــــم

Tuesday, January 27, 2009

أبو إللى جابو أبوك


مدرس إنجليزي بيسأل تلميذ "جوز هند بالإنجليزي يعني إيه؟" قال له "كوكونت"، الأستاذ قال له "حطها ف جملة مفيدة" قال له "كوكونت من الشباك"


راح ديك ينصح فرخة، قال لها: بقى ياخدوا منك البيض وانتي ساكتة، قالت الفرخة: احسن من اللي يأذن ومايصليش


مرة واحد شاف اخوه التوأم، قال له: انت فين من الصبح يخرب بيت شكلك! أمك حمتني مرتين


اثنين محششين .. قال الأول : بالي مشغول من امبارح.. فأجابه الثاني : يمكن حد رافع السماعة


مرة واحد مستعجل اتجوز واحدة مستعجلة خلفوا ولد مش فاضيلهم

تسألونى إيه دة

أقولكم ، أصل افتكرت الدكتور بتاع المادة التانيه ، و اخر محاضرة ليه قبل الإمتحان

أقصى أنواع الكوميديا اللى منعاصه رخامه زى النكت اللى فوق دى

الراجل كان محدد معانا معاد عشان يجيلنا و يقولنا ايه الملغى و اللى حيجى فى الامتحان

محدش يتفاجأ هو بيقولنا اللى حيجى فى الامتحان ازاى يعنى مثلا

الباب الأول ملغى و و عندكم من ص كذا ل ص كذا و من ص كذا ل ص كذا

و هكذا

المهم دة دخل لاقى المدرج مليان و فى ناس قاعده فى الارض و مش عارف ايه راح قايل ايه

انتوا بس اومال فين بقيه الدفعة ، انا عماله اضحك و قاعده فى أول بنش

متنسوش انا لا بيهمنى لا مكان و لا زمان و لا بتفرق معايا

انتوا معدومين التربيه ، هو انا شغال عندكم ، انتو مفكرنى لعبه فى ايديكم

و قعد يشتم و يهزق فينا عشان مش كلنا كنا موجودين و محترمناش انه جيلنا يعنى

و بعد كدة قالنا طب الكتاب كله عليكم و مفيش حاجه ملغية و مش حقولكم حاجه و ابقوا قابلونى لو فلحتم

يا دكتور يهديك يرضيك مفيش فايدة ، الفرح ماشى

فقالنا هاتولى الغياب ، و اللى حضر حديله خمس درجات زيادة
فى ناس دخلت متأخرة على المحاضرة
راح قايلهم ايه ، مين اتصل بيكى و قالك لازم تيجى ها
قالتله مفيش حد اتصل بيا انا موجودة من بدرى
قالها طب هاتيلى اخر نمره اتصلت بيكى و قوليلى اسم اخر حد اتصل بيكى
فبتديله الموبايل
قالها اقرى انتى و قولى بصوت
المهم قالت اسم بنت ، محدش رد
راحت قالتله يا دكتور دى واحدة صحبتى و محدش اتصل بيا
المهم دخلت
و بعد شويه دخلت الاولى على الدفعه فى سنه تالته راح قالها نفس الكلام
راحت قالتله انا كنت تعبانه و مصدعه فروحت و جيت تانى
و اخر حد اتصل بيا واحدة صحبتى اسمها ريهام و مش معانا فى الكلية اصلا و هى من الورديان
قالها طب ادخلى
بعد كدة كان كل تفكيرنا انه يدينا الامتحان بقه و هو على نغمة واحدة
لا مش عطيكم حاجه ، الكتاب كله عليكم ، أصل انتوا قلالات الادب، أنا حعلمكم الادب

المهم خد الغياب و عدنا واحدة واحد ، و عد الاسامى اللى مكتوبه معاه فى الورق

لاقاها مظبوطه

بس و اللهى هو لاقاها مظبوطه بس عشان و احنا بناخد الغياب قال :دلوقتى تلاقى واحده سافله كاتبه اسم زميلتها و مهيش حاضرة

فطبعا كله اترعب و قال يلا نفسى

فلما لقى كله مظبوط سبنا و طلع وقف بره شويه

بيذلنا بقه حنعمل ايه

و دخل مسك الكتاب ، الفصل الاول ملغى ،و من ص كذا ل ص كذا و قعد قال شويه حاجات كدة و طلع بعد مشتمنا تانى


دخلنا الامتحان و الحمد لله لاقينا الاسئله زى مهو كان محدد و عدى على خير الحمد لله

بس بعد متذلينا و اتمسح بكرامتنا الارض

و ماله

كاد المعلم أن يكون رسولا


مش عارفه ارد أقول ايه


و ابقوا قابلونى لوفلحتم


و دمتـــــــــــــــــــــــــــــــــــــــــــــــــــــــم

Saturday, January 24, 2009

نكتة الامتحانات



ياااااااااه وحشنى التدوين اوى ، مكنتش أعرف انى بحبه اوى كدة ، ولسه حكتشف فى نفسى حاجات


بم انى بدأت فى رحله العودة


مش عارفه اقول عليها عودة ولا رحيل ولا نهاية و لا بداية ما علينا خلى الموضوع دة فى الأخر


خلصت امتحانات التيرم الأول و طلعت معاها روحى و كنت حاخد صاروخ على المعمورة دايركت


بس كانت اكتر امتحانات ضحكت فيها ضحك و كنت مستمتعة بأيامى


هو انا كنت حبة الايام بس مش حبه شكل الامتحانات اللى كنت بمتحنها، بس اهى خلصت خلاص


حصل كميه مواقف خلال لجنة الامتحان انا عمرى محنساها


و صحبتكم بقه من النوع اللى مش بيفرق معاها لا مكان ولا زمان ،الأمور بالنسبالى عادى خالص


أول مادة كانت الفئات الخاصة ، تطبيق المادة سهل و حلو ، انما مذاكرتها تدوخ، حالات كتير و أنواع إعاقات


المهم دخلت اللجنة بقول بسم الله الرحمن الرحيم خدت الورقة ، و اللى نزل عليا بضحك ، يخرابى


الاسئلة مدكوكة دكة سودة


يعنى السؤال الواحد مثلا إجابته فصل يعنى ياخد مثلا 3 ورقات من كراسة الإجابة ، و دة بالنسبة للمتفوقين، أما بالنسبالى هى صفحة و نص و سايبه سطر كمان ، أة يا بابا هو انا عندى وقت للتفاهات دى ،انا فاضيه اكتب فصل بحاله فى إجابه سؤال ، اجيب صوابع منين يعنى؟


و بعدين خير ربنا كتير و لسه فى اسئله يعنى ، محدش يزعل،المهم كتبت على أد مقدر.


المهم طبعا فى اسئلة مكنتش فاكرة إجابتها، فسألت البت اللى جنبى


بت.....بت....انتى يا بت


بصيتلى اوى كدة يعنى عايزة ايه؟


السؤال الاخير ها سامعه السؤال الاخير


بصى فى ورقتك يا أنسة


دة كان المراقب


بصيتله كأنه قطع عليا حديث مهم


و بصيت فى ورقتى بعد شويه ناديتلها تانى و قولتلها فكرينى بأول نقطة بس و انا حجيب الباقى


انتى يا أنسه


يا عم بقه بص انت فى ورقتك بقه متقرفناش


المهم قالتلى على أول نقطة


و الحمد لله ربنا كرم بالباقى و حليت السؤال رغم انفه


و دة كان اول إمتحان، و كان بالنسبالى بداية غير مشرفة أبدا ، لأنى حسة انى بردوه إنى معملتش فيه زى مكنت عايزة


بس الحمد لله على كل شىء


و عدت أول مادة بعد مطلعت روحى


لسه فى بقية الأيام المشرفة


ياما فى الجراب يا حاوى


و ابقوا قابلونى لو فلحتم




و دمتــــــــــــــــــــــــــــــــــــــــــــــــــــم


Tuesday, December 23, 2008

حادثة ظريفة حدثت في القطار


بينما قطار يشق طريقه في فرنسا, كان يجلس في داخل إحدى العربات أربعة أفراد متقابلين: أمريكي وأفغاني وفتاة وامرأة عجوز

. دخل القطار في نفق مظلم فسمع الركاب صوت قبلة ثم تلاها صوت صفعة على الوجه

، فلما خرج القطار من النفق شوهد الأمريكي يحك خده وقد أحمر

. فدار هذا الحوار في أنفسهم



قالت العجوز: يا لها من فتاة متربية قبلها الأمريكي فصفعته على وجهه

وقالت الفتاة: يا له من أمريكي غبي يتركني أنا ويقبل هذه العجوز



وقال الأمريكي: يا له من أفغاني محظوظ يقبل الفتاة وأتلقى أنا الصفعة

وقال الأفغاني: يا لها من حركة ذكية قبلت أنا يدي وصفعت بها الأمريكي


منقوووووووووووووووووووووووووووول

Sunday, December 7, 2008

ماااء ماااء .... ماء ماء ماء


الكل بيتساءل انتى فين يا سامو

مش باينه ليه يا سامو

وحشتينا اوى يا سامو

بجد كلامكم دة يا جماعة فرحنى جدا جدا جدا

و الحب الكتير دة فرحنى جدا

و عرفنى اد ايه انا عزيزة عليكم

و اد ايه انا مقصرة فى حقكم

بس غصب عنى و اللهى

عندى شغل كتير للكليه

و مش عارفه اعد على النت خالص و حتى لو قعدت ببقى بنزل حاجات للكليه

على العموم سيبلكم من السيره الوحشه دى

انتوا وحشتونى جدا جدا

كلكم كلكم

بدون استثناء

كل سنه و انتوا طيبين

و بألف صحه و سلامه

و عيد اضحى مبارك عليكم يا رب

مين بقى دبح السنه دى


و عايزة منابى من اللحمه

بصراحه احنا مدبحناش السنه دى

عشان كدة اللى دبح يشيلى منابى


متفقين


بوست قصير و مختصر

بس اعمل ايه

اينعم هو عيد

بس بردوه مكركبه بسبب الكليه


كل عام و أنتم بخير

Friday, October 31, 2008

الله لون يا لون


أبدأ منين
مش عارفه بصراحه
كله عمال يسأل على غيبتى الطويله
بس و اللهى مش بإيدى يا جماعه
الدراسه بدأت و الواحد السنه دى فى رابعه
بعنى بكالوريوس
و لازم اشد حيلى شويه عشان التقدير و عشان تعب السنين اللى فاتت ميروحش هدر
بس السنه دى شكلها مش عاجبنى خالص
لا فى شغل الكليه ولا فى الصحبه و لا زمايلى فى مجموعه الشغل
الحكايه و ما فيها
انا عليا فى مادة السنه دى انى اصمم عرض يعبر عن شعب
يعنى عرض عالمى مثلا عن شعب محدد
و طبعا ملابس الشعب دة بالظبط و ادواته الموسيقيه
و لازم يكون للرقصه هدف
المجموعه بتاعتى تتكون من 12 نفر
حلو الكلام
انا افترحت عليهم اننا نعمل رقصة نوبى
و انا ممكن اجيبلهم اللبس و الاكسسوارات و اعرفلهم الادوات الموسيقيه كمان
و اجيبلهم اغنيه العرض
و حمدت ربنا ان كل حاجه متسهله
انا اعرف اسرة نوبيه و حيجبولى كل حاجه الحمد لله
كدة مبقاش علينا غير اننا نعمل الادوات الموسيقيه و ان احنا نتدرب على العرض و نشوف ايه اللى ممكن نقصنا من الملابس
و نشتريه
دخلنا سكشن المادة دى الاستاذه بتسأل مين الليدر بتاعتكم
فبقولهم يا جماعه انا حبقى الليدر عشان انا جايبه كل حاجه لو مش موافقين خلاص
راحت واحدة قايمه هى الليدر علينا بس فى مادة تانيه
و قالت انا الليدر حد عنده اعتراض
كلنا ساكتنا
و انا عادى مفيش مشكله دة كدة احسنلى هى مسؤله تجمعنا و تجهز الشغل و تدينا احنا نعمل ايه
لحد دلوقتى الكلام حلو و جميل
تعالو بقه عشان نتدرب
واحدة تقولى لا اصل انا لازم اسافر و التانيه مش عارف ايه
ما علينا جيت يوم و قلتلهم حنتدرب بكرة و حجيب الكاسيت معايا حد عنده اعتراض
يا جماعه محدش يقولى حنسافر و مش عارف ايه
انا عندى شغل بكرة بعد الكليه و حشيل الكاسيت و اخده معايا للشغل كمان
قالوا خلاص
جينا تانى يوم
يا سامو احنا مسافرين و مش عارف ايه
مش عايزة اوصفلكم انا صوتى كان عامل ازاى
انتوا بتستعبطوا انا سألتكم امبارح
المهم فى الاخر قعدتهم بردوه و اتدربنا كل دة و الليدر معملتش حاجه
بعد كدة مبقوش يتجمعوا و لا بيتدربوا و انا تعبت كمان
و بقيت اروح متأخرة عليهم
قعدت مع نفسى كدة و قلت انا مش حسكت
جيت تانى يوم و قلتلهم ايه
البنت اللى جابتلى اللبس النوبى الرجالى انا اتخانقت معاها و رجعتلها اللبس
و صاحبه اللبس الحريمى معلش انا مش مسؤله اتحمل مسؤوليه خمس بنات
دة التوب النوبى ب 125 جنيه
لو حاجه اتقطعت انا اللى حتحمل مسئوليتها
و كدة انا حسود وشى قدام الست
و دى انا مدرسه بنتها
و حشوفها كتير مينفعش
لازم نشترى اللبس مفيش حل تانى
عايزة اقولكم اتلخبطوا و بقوا مش عارفين يعملوا ايه
و روحت للبنت الليدر و قولتلها انا مش مسئوله اجمعكم و اجيب الكاسيت و الاغنيه
الكاسيت معاكم اهوه و انتى اللى مسئوله تجمعينا و تحددىمعاد عشان نتدرب فيه مش انتى الليدر
قالتلى لا ماليش دعوه و انتى اللى عارفه الحركات و مش عارف ايه
قولتلها اللى يختار حاجه يتحمل مسئوليه اختياره
ازاى انتى الليدر و انا اللى بعمل كل الشغل
معلش اسفه
و سيبتهم و مشيت و على وشهم صدمه
صعبوا عليا و اللهى
بس قلت لا
عشان ربنا سهلها علينا و كل حاجه جهزت
و هما حتى مش عايزين يعملوا اللى عليهم و لا بيتجمعوا عشان نتدرب
يشيلوا بقه
اصل هما مش بيشتغلوا إلا لما بيتذنقوا
بس فى واحده فى المجموعه انا قلتلها انى حعمل كدة و ان اللبس موجود و كل حاجه موجوده
بس انا عايزاهم يتذنقوا عشان يشتغلوا
كلمتها امبارح و قلتلها ايه الاخبار
قالتلى على فكرة بيفكروا يغيروا الاغنيه و يغيروا العرض
يعملوه صعيدى او اى حاجه
قلتلها مش حيعرفوا
قالتلى بس انتى عندك حق
لما اتذنقوا بدأو يفكروا
قلتلها سيبيهم مش حيعرفوا يجيبوا كل حاجه
و الدكتورة مش حترضى بكده
و اما اشوف بكرة ايه اللى حيحصل معاهم
الله اعلم
انا قلت احكيلكم عشان تعرفوا المعاناه اللى انا فيها بس
و عايزة كمان اعرف رائيكم فى اللى عملته
صح ولا غلط
ولو كان غلط
يبقى ايه الصح؟

و دمتــــــــــــــــــــــــــــــــــــــــــــــــــــــــــــــــــــــــــــــــــم

ملحوظه
الله لون يا لون دة اسم الاغنيه بتاعه العرض
و الصورة ملهاش علاقه بالموضوع
عادى يعنى

Wednesday, October 1, 2008

خدتوا العيديه و لا لسه؟؟!!شكلها لسه










كل سنه و انتوا طيبين يا احلى صحبه


و احلى عيد سعيد على اجدع بلوجريه فى تاريخ البلوجرز


و كل سنه و الشعب (بكشر الشين)المصرى كله طيب


انا حبيت اهنيكم بعيد الفطر المبارك


و اعزمكم على جميع انواع و اشكال الكحك











و عايزاكم تزيدوا خمسه سته كيلو


و انا متأكدة انكم حتاكلوا صوابعكم وراه


و ابقوا ادعولى


و ان شاء الله فى العيد دة الكل يقدر يزور قرايبهو يعيد عليهم


و اللى يدوق الكحك بتاعى

ومينساش العيديه بتاعتى


ههههههههههههههههههههههههههههههههههه


و كل سنه و انتوا طيبين



و دمتـــــــــــــــــــــــــــــــــــــــــــــــــــــــم

Sunday, September 14, 2008

حدوته فى رسمه


انا داخله متنرفزة و عفاريت الدنيا بتتنطط قدامى

و دى مندمجه اوى فى اللى هى بتعمله

فقلت لا بقه انا مش حتنرفز لوحدى

انتى بتعملى ايه يا ريهام

برسم

لا يا شيخه ...ال يعنى انا مش شايفه

ايه دة يا شيخه و لا بيكاسو فى زهوته

قالتلى اصل انا لما ابقى مخنوقه ...ساعات برسم

انا بقه فى تركيز عميق..... اممممممممممممممممم!!! و ماله

طب بترسمى ايه

بصى و انتى تعرفى


و ادى الرسمه قدامكم فوق

بس بجد عجبتنى جدا

و قلت بجد دة الخنقه بتطلع مواهب و اللهى

و لما بصيت فى الرسمه و ركزت فيها

حسيت بهدوء

عشان انا مش مجرد بصيت عليها انا تخيلت المكان و الزمان و الصحبه الحلوه

فحسيت بهدوء


انتوا ايه رائيكم؟


و دمتـــــــــــــــــــــــــــــــــــــــــــم