باك تو سكول

بكرة بدايه التيرم التانى و أجازة نص السنه تخلص النهاردة و انا مريحتش فيها خالص

انا يادوبك خلصت امتحانات نص السنه و لسه يادوب بقول يا هادى حريح بقه و انزل كل يومين كدة اتمشى شويه على البحر

أو اروح بحرى و اكل فطيرة بالسكر و سندوتشين كبده

و اللهى كان حلم جميل جدا

اللى حصل ان تقريبا بعد يومين من الاجازة جالى تليفون من الكورس اللى باخد فيه أى سى دى إل

و فحواه انى لازم اروح اخلص الامتحانات فى خلال اسبوعين و إلا المنحه حتتلغى

طول فترة الاجازة و انا عماله أذاكر و مش بنام و اروح امتحن

و الكارثة بقه

احجز مثلا الساعه 4 ادخل الامتحان الساعه 5 و نص او 6

يعنى اروح فى معادى و اتلطع هناك ساعتين

و معاهد كتير بقه بتمتحن هناك و ناس كتير اوى اوى أصل وزارة الاتصالات اللى مديه المنحه للعالم اللى زييى عايزه تخلص

تعمل ايه بقه

جمعت كل الناس اللى فى المعاهد اللى المفروض يمتحنوا فى حته واحدة و هى المنطقة الشمالية بالاسكندرية

كل الناس جيه من جميع معاهدك يا اسكندرية و بتمتحن فى نفس المكان

تخيلوا الزحمه و الهرجله و التأخير و تعب الاعصاب لأن النتيجه بتظهر فى ساعتها و بتبقى طالع من الامتحان عارف

انت ناجح و لا ساقط

و انا لسة مخلصه امتحانات امبارح و بقول استريح بقة و أنام حبة كدة

أكتشف إكتشاف رهيب

بكرة مع الأسف الشديد أول يوم فى التيرم التانى

أواه يا قلبى

و إكتشفت برضه ان بكرة الفلانتين

قلت الحمد لله

قضا أخف من قضا

اهو الواحد حيلاقى حاجه يسلى بيها نفسه

و بمناسبه التيرم التانى اتمنى لنفسى و لكم النجاح و التوفيق

يا رب ألاقى وقت أدون فيه

دعواكم

و دمتـــــــــــــــــــــــــــــــــــــــــــــــــــــم

أبو إللى جابو أبوك

مدرس إنجليزي بيسأل تلميذ "جوز هند بالإنجليزي يعني إيه؟" قال له "كوكونت"، الأستاذ قال له "حطها ف جملة مفيدة" قال له "كوكونت من الشباك"

راح ديك ينصح فرخة، قال لها: بقى ياخدوا منك البيض وانتي ساكتة، قالت الفرخة: احسن من اللي يأذن ومايصليش

مرة واحد شاف اخوه التوأم، قال له: انت فين من الصبح يخرب بيت شكلك! أمك حمتني مرتين

اثنين محششين .. قال الأول : بالي مشغول من امبارح.. فأجابه الثاني : يمكن حد رافع السماعة

مرة واحد مستعجل اتجوز واحدة مستعجلة خلفوا ولد مش فاضيلهم

تسألونى إيه دة

أقولكم ، أصل افتكرت الدكتور بتاع المادة التانيه ، و اخر محاضرة ليه قبل الإمتحان

أقصى أنواع الكوميديا اللى منعاصه رخامه زى النكت اللى فوق دى

الراجل كان محدد معانا معاد عشان يجيلنا و يقولنا ايه الملغى و اللى حيجى فى الامتحان

محدش يتفاجأ هو بيقولنا اللى حيجى فى الامتحان ازاى يعنى مثلا

الباب الأول ملغى و و عندكم من ص كذا ل ص كذا و من ص كذا ل ص كذا

و هكذا

المهم دة دخل لاقى المدرج مليان و فى ناس قاعده فى الارض و مش عارف ايه راح قايل ايه

انتوا بس اومال فين بقيه الدفعة ، انا عماله اضحك و قاعده فى أول بنش

متنسوش انا لا بيهمنى لا مكان و لا زمان و لا بتفرق معايا

انتوا معدومين التربيه ، هو انا شغال عندكم ، انتو مفكرنى لعبه فى ايديكم

و قعد يشتم و يهزق فينا عشان مش كلنا كنا موجودين و محترمناش انه جيلنا يعنى

و بعد كدة قالنا طب الكتاب كله عليكم و مفيش حاجه ملغية و مش حقولكم حاجه و ابقوا قابلونى لو فلحتم

يا دكتور يهديك يرضيك مفيش فايدة ، الفرح ماشى

فقالنا هاتولى الغياب ، و اللى حضر حديله خمس درجات زيادة

فى ناس دخلت متأخرة على المحاضرة

راح قايلهم ايه ، مين اتصل بيكى و قالك لازم تيجى ها

قالتله مفيش حد اتصل بيا انا موجودة من بدرى

قالها طب هاتيلى اخر نمره اتصلت بيكى و قوليلى اسم اخر حد اتصل بيكى

فبتديله الموبايل

قالها اقرى انتى و قولى بصوت

المهم قالت اسم بنت ، محدش رد

راحت قالتله يا دكتور دى واحدة صحبتى و محدش اتصل بيا

المهم دخلت

و بعد شويه دخلت الاولى على الدفعه فى سنه تالته راح قالها نفس الكلام

راحت قالتله انا كنت تعبانه و مصدعه فروحت و جيت تانى

و اخر حد اتصل بيا واحدة صحبتى اسمها ريهام و مش معانا فى الكلية اصلا و هى من الورديان

قالها طب ادخلى

بعد كدة كان كل تفكيرنا انه يدينا الامتحان بقه و هو على نغمة واحدة

لا مش عطيكم حاجه ، الكتاب كله عليكم ، أصل انتوا قلالات الادب، أنا حعلمكم الادب

المهم خد الغياب و عدنا واحدة واحد ، و عد الاسامى اللى مكتوبه معاه فى الورق

لاقاها مظبوطه

بس و اللهى هو لاقاها مظبوطه بس عشان و احنا بناخد الغياب قال :دلوقتى تلاقى واحده سافله كاتبه اسم زميلتها و مهيش حاضرة

فطبعا كله اترعب و قال يلا نفسى

فلما لقى كله مظبوط سبنا و طلع وقف بره شويه

بيذلنا بقه حنعمل ايه

و دخل مسك الكتاب ، الفصل الاول ملغى ،و من ص كذا ل ص كذا و قعد قال شويه حاجات كدة و طلع بعد مشتمنا تانى

دخلنا الامتحان و الحمد لله لاقينا الاسئله زى مهو كان محدد و عدى على خير الحمد لله

بس بعد متذلينا و اتمسح بكرامتنا الارض

و ماله

كاد المعلم أن يكون رسولا

مش عارفه ارد أقول ايه

و ابقوا قابلونى لوفلحتم

و دمتـــــــــــــــــــــــــــــــــــــــــــــــــــــــم

نكتة الامتحانات

ياااااااااه وحشنى التدوين اوى ، مكنتش أعرف انى بحبه اوى كدة ، ولسه حكتشف فى نفسى حاجات

بم انى بدأت فى رحله العودة

مش عارفه اقول عليها عودة ولا رحيل ولا نهاية و لا بداية ما علينا خلى الموضوع دة فى الأخر

خلصت امتحانات التيرم الأول و طلعت معاها روحى و كنت حاخد صاروخ على المعمورة دايركت

بس كانت اكتر امتحانات ضحكت فيها ضحك و كنت مستمتعة بأيامى

هو انا كنت حبة الايام بس مش حبه شكل الامتحانات اللى كنت بمتحنها، بس اهى خلصت خلاص

حصل كميه مواقف خلال لجنة الامتحان انا عمرى محنساها

و صحبتكم بقه من النوع اللى مش بيفرق معاها لا مكان ولا زمان ،الأمور بالنسبالى عادى خالص

أول مادة كانت الفئات الخاصة ، تطبيق المادة سهل و حلو ، انما مذاكرتها تدوخ، حالات كتير و أنواع إعاقات

المهم دخلت اللجنة بقول بسم الله الرحمن الرحيم خدت الورقة ، و اللى نزل عليا بضحك ، يخرابى

الاسئلة مدكوكة دكة سودة

يعنى السؤال الواحد مثلا إجابته فصل يعنى ياخد مثلا 3 ورقات من كراسة الإجابة ، و دة بالنسبة للمتفوقين، أما بالنسبالى هى صفحة و نص و سايبه سطر كمان ، أة يا بابا هو انا عندى وقت للتفاهات دى ،انا فاضيه اكتب فصل بحاله فى إجابه سؤال ، اجيب صوابع منين يعنى؟

و بعدين خير ربنا كتير و لسه فى اسئله يعنى ، محدش يزعل،المهم كتبت على أد مقدر.

المهم طبعا فى اسئلة مكنتش فاكرة إجابتها، فسألت البت اللى جنبى

بت.....بت....انتى يا بت

بصيتلى اوى كدة يعنى عايزة ايه؟

السؤال الاخير ها سامعه السؤال الاخير

بصى فى ورقتك يا أنسة

دة كان المراقب

بصيتله كأنه قطع عليا حديث مهم

و بصيت فى ورقتى بعد شويه ناديتلها تانى و قولتلها فكرينى بأول نقطة بس و انا حجيب الباقى

انتى يا أنسه

يا عم بقه بص انت فى ورقتك بقه متقرفناش

المهم قالتلى على أول نقطة

و الحمد لله ربنا كرم بالباقى و حليت السؤال رغم انفه

و دة كان اول إمتحان، و كان بالنسبالى بداية غير مشرفة أبدا ، لأنى حسة انى بردوه إنى معملتش فيه زى مكنت عايزة

بس الحمد لله على كل شىء

و عدت أول مادة بعد مطلعت روحى

لسه فى بقية الأيام المشرفة

ياما فى الجراب يا حاوى

و ابقوا قابلونى لو فلحتم

و دمتــــــــــــــــــــــــــــــــــــــــــــــــــــم

حادثة ظريفة حدثت في القطار

بينما قطار يشق طريقه في فرنسا, كان يجلس في داخل إحدى العربات أربعة أفراد متقابلين: أمريكي وأفغاني وفتاة وامرأة عجوز

. دخل القطار في نفق مظلم فسمع الركاب صوت قبلة ثم تلاها صوت صفعة على الوجه

، فلما خرج القطار من النفق شوهد الأمريكي يحك خده وقد أحمر

. فدار هذا الحوار في أنفسهم

قالت العجوز: يا لها من فتاة متربية قبلها الأمريكي فصفعته على وجهه

وقالت الفتاة: يا له من أمريكي غبي يتركني أنا ويقبل هذه العجوز

وقال الأمريكي: يا له من أفغاني محظوظ يقبل الفتاة وأتلقى أنا الصفعة

وقال الأفغاني: يا لها من حركة ذكية قبلت أنا يدي وصفعت بها الأمريكي

منقوووووووووووووووووووووووووووول

الله لون يا لون

أبدأ منين
مش عارفه بصراحه
كله عمال يسأل على غيبتى الطويله
بس و اللهى مش بإيدى يا جماعه
الدراسه بدأت و الواحد السنه دى فى رابعه
بعنى بكالوريوس
و لازم اشد حيلى شويه عشان التقدير و عشان تعب السنين اللى فاتت ميروحش هدر
بس السنه دى شكلها مش عاجبنى خالص
لا فى شغل الكليه ولا فى الصحبه و لا زمايلى فى مجموعه الشغل
الحكايه و ما فيها
انا عليا فى مادة السنه دى انى اصمم عرض يعبر عن شعب
يعنى عرض عالمى مثلا عن شعب محدد
و طبعا ملابس الشعب دة بالظبط و ادواته الموسيقيه
و لازم يكون للرقصه هدف
المجموعه بتاعتى تتكون من 12 نفر
حلو الكلام
انا افترحت عليهم اننا نعمل رقصة نوبى
و انا ممكن اجيبلهم اللبس و الاكسسوارات و اعرفلهم الادوات الموسيقيه كمان
و اجيبلهم اغنيه العرض
و حمدت ربنا ان كل حاجه متسهله
انا اعرف اسرة نوبيه و حيجبولى كل حاجه الحمد لله
كدة مبقاش علينا غير اننا نعمل الادوات الموسيقيه و ان احنا نتدرب على العرض و نشوف ايه اللى ممكن نقصنا من الملابس
و نشتريه
دخلنا سكشن المادة دى الاستاذه بتسأل مين الليدر بتاعتكم
فبقولهم يا جماعه انا حبقى الليدر عشان انا جايبه كل حاجه لو مش موافقين خلاص
راحت واحدة قايمه هى الليدر علينا بس فى مادة تانيه
و قالت انا الليدر حد عنده اعتراض
كلنا ساكتنا
و انا عادى مفيش مشكله دة كدة احسنلى هى مسؤله تجمعنا و تجهز الشغل و تدينا احنا نعمل ايه
لحد دلوقتى الكلام حلو و جميل
تعالو بقه عشان نتدرب
واحدة تقولى لا اصل انا لازم اسافر و التانيه مش عارف ايه
ما علينا جيت يوم و قلتلهم حنتدرب بكرة و حجيب الكاسيت معايا حد عنده اعتراض
يا جماعه محدش يقولى حنسافر و مش عارف ايه
انا عندى شغل بكرة بعد الكليه و حشيل الكاسيت و اخده معايا للشغل كمان
قالوا خلاص
جينا تانى يوم
يا سامو احنا مسافرين و مش عارف ايه
مش عايزة اوصفلكم انا صوتى كان عامل ازاى
انتوا بتستعبطوا انا سألتكم امبارح
المهم فى الاخر قعدتهم بردوه و اتدربنا كل دة و الليدر معملتش حاجه
بعد كدة مبقوش يتجمعوا و لا بيتدربوا و انا تعبت كمان
و بقيت اروح متأخرة عليهم
قعدت مع نفسى كدة و قلت انا مش حسكت
جيت تانى يوم و قلتلهم ايه
البنت اللى جابتلى اللبس النوبى الرجالى انا اتخانقت معاها و رجعتلها اللبس
و صاحبه اللبس الحريمى معلش انا مش مسؤله اتحمل مسؤوليه خمس بنات
دة التوب النوبى ب 125 جنيه
لو حاجه اتقطعت انا اللى حتحمل مسئوليتها
و كدة انا حسود وشى قدام الست
و دى انا مدرسه بنتها
و حشوفها كتير مينفعش
لازم نشترى اللبس مفيش حل تانى
عايزة اقولكم اتلخبطوا و بقوا مش عارفين يعملوا ايه
و روحت للبنت الليدر و قولتلها انا مش مسئوله اجمعكم و اجيب الكاسيت و الاغنيه
الكاسيت معاكم اهوه و انتى اللى مسئوله تجمعينا و تحددىمعاد عشان نتدرب فيه مش انتى الليدر
قالتلى لا ماليش دعوه و انتى اللى عارفه الحركات و مش عارف ايه
قولتلها اللى يختار حاجه يتحمل مسئوليه اختياره
ازاى انتى الليدر و انا اللى بعمل كل الشغل
معلش اسفه
و سيبتهم و مشيت و على وشهم صدمه
صعبوا عليا و اللهى
بس قلت لا
عشان ربنا سهلها علينا و كل حاجه جهزت
و هما حتى مش عايزين يعملوا اللى عليهم و لا بيتجمعوا عشان نتدرب
يشيلوا بقه
اصل هما مش بيشتغلوا إلا لما بيتذنقوا
بس فى واحده فى المجموعه انا قلتلها انى حعمل كدة و ان اللبس موجود و كل حاجه موجوده
بس انا عايزاهم يتذنقوا عشان يشتغلوا
كلمتها امبارح و قلتلها ايه الاخبار
قالتلى على فكرة بيفكروا يغيروا الاغنيه و يغيروا العرض
يعملوه صعيدى او اى حاجه
قلتلها مش حيعرفوا
قالتلى بس انتى عندك حق
لما اتذنقوا بدأو يفكروا
قلتلها سيبيهم مش حيعرفوا يجيبوا كل حاجه
و الدكتورة مش حترضى بكده
و اما اشوف بكرة ايه اللى حيحصل معاهم
الله اعلم
انا قلت احكيلكم عشان تعرفوا المعاناه اللى انا فيها بس
و عايزة كمان اعرف رائيكم فى اللى عملته
صح ولا غلط
ولو كان غلط
يبقى ايه الصح؟

و دمتــــــــــــــــــــــــــــــــــــــــــــــــــــــــــــــــــــــــــــــــــم

ملحوظه

الله لون يا لون دة اسم الاغنيه بتاعه العرض

و الصورة ملهاش علاقه بالموضوع

عادى يعنى

كلمتين كاتمين على نفسى

دول كلمتين كاتمين على نفسى حبتين

و بم ان دة بلوج الفضفضه و القرف

و تزهيق بقيه البلوجريه معانا

نصيبهم بقه نعمل ايه

تقولولى اكتر حاجه تنرفزك فى الدنيا ايه يا بت يا سامو

اقولكم اللى يحاول انه يبوظلى حاجه انا مخططالها

او انه يدخل فى خطه ما بحاول اعملها

او انه يدخل فى نمط حياتى ويحاول يمشيه على مزاجه

او انه يحاول يقرفنى فى عيشتى

احب اقولكم ايها الساده عن ان البنى ادم دة

قولوه عليه يا رحمان يا رحيم

لانه باللى عمله دة

صحى بركان كان خامد جوايا

او شرب تنين شويه جاز

و حينفجر فى وشه ان شاء الله

انا فى حاله من النرفزه عاليا اوى

لأن النهاردة كان يوم مهم اوى بالنسبالى و كنت مخططه اعمل فيه حاجه مهمه جدا

بس نقول ايه بقه

لا نزلت و لا عملت اللى كنت مخططاله

و انا فعلا فى قمه نرفزتى

و الكى بورد من قوة صوابعى عليها و انا بكتب الكلام دة

حتقوم تشتمنى

مش عارفه اعمل ايه ؟

مضايقه اوى اوى اوى

و مش طايقه نفسى

مش عارفه اعمل حاجه

مفيش فايده على رأى مصطفى قمر

مفيش فايده

و دمتـــــــــــــــــــــــــــــــــــــــــــــــــم

العفاريت الجزء التانى

معلش يا جماعه إتأخرت عليكم

بس معلش سامحونى الشغل و اللهى

فى مواقف كتير اوى حصلت فى الاسبوع اللى فات دة فى الشغل

اخرهم متعلق ب حسين

حسين اتنقل من الفصل بتاعى (عقبال الواد احمد حسام)حيشلنى

المهم

حسين راح فصل الخمس سنين

بس حصل موقف النهاردة

كان عمال يهزر مع الميس بتاعته و يضرب فيها

و هى تضرب فيه

روحت قولتلها يا بنتى دة غلط

مينفعش كدة

قالتلى دة التعامل معاه كدة

فالتلى مفيش غير كدة

عشان يتشغل

فبقولها ممكن تشغليه بس من غير ضرب

راحت قالتلى لا مينفعش معاه غير كدة

المهم كان فى كابتن سامع الحوار

واد فى تربيه رياضيه اهبل المفروض انه اتخرج السنه دى

من كليه تربيه رياضيه بنين

راح نادى على حسين و قاله تعالى يا حسين

لما حد يمسكك كدة من دراعك و راح فاردله دراعاته على الجنبين

قاله فى دماغ اهه اضرب بيها فى مناخير اللى قدامك

انا كنت حتشل و انا بسمع الكلام دة

الواد عنيف اصلا

و انت جاى تعلمه ازاى يضرب

بقوله غلط كدة يا كابتن

قالى لا مش غلط عشان يتعلم

قلتله هو عنيف لوحده مش ناقص

و المدرسه بتاعته مصممه ان دة الصح

روحت قولتلها مش بيتعامل معايا كدة

تصوروا الاخ يقول للواد ايه

تعال يا حسين

شايف الميس دى (و بيشاور عليا)عليها

الواد حسين وقف مكانه

و عمال يبصله و يبصلى

راح قاله عليها يا حسين

راح قاله مينفعش

قاله اشمعن دى يعنى

راح الواد وشوشوه فى ودنه

راح قاله طب اضربها ضربه بسرعه و اطلع اجرى

راح جى ضربنى على دراعى و طلع يجرى

قولولى انا اعمل ايه مع البنى ادم دة

و اللهى كنت حشتمه

كنت حشتمه بجد

بس قلت يا واد طنش خالص

و اهدى كدة

عشان بجد كنت حاكله

كل حاجه انا بحاول ابنيها مع الواد دة

فى حيوان عمال يهدها

تعرفوا

لما الواد يبقى يستاذن قبل ميروح اى حته

و عرف يعنى ايه احترام الغير

هو مش بقى برفكت اوى

بس اتحسن

مبقاش بيعمل مشاكل زى الاول

الواد دلوقتى مقدور عليه يومين معاه و اظبطه سهله

انما بقه شحط طويل و اهبل دة انا اعمل معاه ايه؟

حد يقولى عشان الحوار دة طالع من نفوخى بصراحه

انا ممكن امسك الحيوان دة اغسله يعنى

و اخليه يتمنى الارض تنشق و تبلعه من كلامى

بس قلت أسألكم الاول

مع العلم

انا ميفرقش معايا البنى ادم دة خالص

انا يهمنى حسين

و الظاهر ان البوست دة عن حسين بردوه

معلش

بس بجد قولولى رائيكم

و دمتــــــــــــــــــــــــــــــــــــــــــــــــــــــــــــــــــم

اللى يسرق يروح فين ياما...يروح مارينا

لاقيت نفسى فاضيه و مستنيه بفارغ الصبر فيلم جاكى شان الجديد ينزل

قلت ايه يا بت يا سامو اكتبى بوست و فضفضى شويه

اهو الواحد يغير كتمه الامتحانات

المهم

جه فى برنامج 90 دقيقه بتاع معتز الدمرداش اللى بيجى على قناه المحور

كانوا جايبين واحد

و كان فى واحد معارض ليه

و جابوا سيره اسراء

المعارض قال

بعد ما المحكمه برئتها

اعتقلتوها

راح الواحد بقه قالوه ايه

مين قال اننا اعتقلناها ورينى امر الاعتقال

المعارض قاله اومال انتوا خادتوها عندكم ليه

الواحد قاله

استضفناها عندنا شويه



و من هنا اعزائى المشاهدين و المستمعين و القراء و كل البنى ادمين يعنى

نقدم لكم اروع مناطق التصييف و الاستضافه

عند

حبايبنا الحلوين (على رأى فيلم خلى الدماغ صاحى)و دلوقتى



اللى يسرق يروح فين ياما .....يروح مارينا



و اللى يصيف يروح فين ياما.....يروح عند حبايبنا الحلوين



و عجبى

واحد تاج و صلحه

استغفر الله العظيم

يا قاعدين يكفيكوا شر التاجات اللى جيه

ما علينا

متشكرين اخويا ولد مصرى

منتحرمش من المشاركه

حستناك بره على فكرة

حدخل فى الموضوع على طول عشان مفيش وقت

بيقولك

لو أعطيتك ثلاثة وردات من هم الأشخاص اللي هتديهم الورد ده؟

واحدة لنفسى (المعنى فى بطن الشاعر) و كل واحد براحته

واحدة لجدتى

واحدة لوالد نفسى(معرفش ليه بس يستحقها) براحتى برضه

معاك 3 سطور إكتب اللي عايزه

يا رب ابعد عنى الشيطان و سامحنى اذا عصيتك فى يوم او فى لحظه و اغفرلى يا رب العالمين

نفسى حياتى بعشقك و عقبال ما تيجى و تتربعى على عرش قلبى ايتها الملكه لى

واحشانى ساسو سندريلا مايا يويو مولى و ربنا معاك يا منعم

ما هو هدفك في الحياة

اتخرج بتقدير عالى إن شاء الله و اشتغل و اتجوز البنى ادم اللى بحبه و يحبنى(يا رب يجى شكلى حعنس)و اسفر والدتى عمرة و حج

و محدش يزعل منى ابدا

إن شاء الله بكرة أحسن من النهاردة هل تصدق هذه المقولة؟

طبعا لان لو النهاردة كان وحش و ضاع منى بإذن الله فى بكرة و اكيد حيكون احسن من النهارده

ما هي أجمل مقولة سمعتها؟

الزمن بطىء جدا لمن ينتظر

سريع جدا لمن يخشى

طويل جدا لمن يتالم

قصير جدا لمن يحتفل

و لكنه الابديه لمن يحب

مين المغني اللي بتحبه؟ وإيه أغنيتك المفضلة؟

ماليش مغنى مفضل و اغنيتى المفضله وقتيه يعنى بتاخد وقتها و بنساها بس انا بحب الاغانى اليابانى

غزة تمثل إيه في حياتك؟

مشكله طولت اوى و بقه حاجه زى الميه و الهوا

تعطي كام في المية لإنتمائك للوطن؟

%99.9

لو تزوجت وأنجبت قول أسماء الأولاد والبنات اللي تحبهم؟

الاولاد:جهاد و ادهم و ادم و رعد

البنات:جودى و ساندرين و سالمين

عمرك غشيت وأنت صغير؟

اكيد .....بس بطلت دلوقتى و عمرى متقفشت ههههههههههههه

لو اتعرضت عليك رشوة وانت في زنقة هتعمل ايه؟

مش حاخدها و لا اقربلها اساسا لانها اكيد اكيد مش حتحللى الزنقه لانها مش حلال

قول 3 صفات في 3 كلمات توصف بيهم شخصيتك؟

عصبيه

قلبى ابيض

مرحه

أول مرتب ليك ولو هتجيب هدايا لعائلتك هتجيب ايه لكل فرد؟

لو كان بالدولار و دة استبعده يبقى ححط زكاه اولا و بعدين اجيب هدايا لعائلتى اللى يطلبوه

اللى عايزينه بقه

براحتهم

أهم صفة في شريك حياتك؟

يكون راجل بجد و يحسسنى بالامان و يبقى سندى فى دنيتى و اخرتى و يحبنى اكيد طبعا

المجال اللي غير دراستك بتحبه حتى لو كنت بترسم على الحيطة؟

ابقى مدربه كره سله

بتحب السفر؟ طب ايه المكان اللي عاوز تروحه دلوقتي من غير ما تفكر؟

بحب السفر اوى بس لاماكن جديده و احب اروح اليونان او ايطاليا

تمرر التاج لمين؟

بم ان داين تدان

يبقى على و على اصحابى

حبايب

سندريلا

مفقوعه مرارتى

انت عارفنى و انا عارفك

همسات مصريه

دينا ضحك و لعب

حامل شعله المخلدين

و اى خدمه من اسكندريه

و دمتـــــــــــــــــــــــــــــــــــــــــــم

الخيانه........... و اشياء اخرى

تحديث

عجبنى اوى اوى الحوار الساخن جدا الدائر داخل الكومنتس

بس انا حبيت اوضح حاجه

انا لما اتكلمت عن الخيانه اتكلمت عنها بطريقه عامه

و محددتش بين مين و مين

و قلت ممكن تكون حبيب قريب صديق

و اكيد بين الزوج و الزوجه

ممكن يحصل خيانه

و ما اقساها من خيانه

الخيانه يا جماعه مش لازم تكون بسبب معين

فى ناس بتخون لمجرد ان الخيانه خلاص بقه حاجه عاديه فى دمها

و انها تضرب فى ضهر اللى قدامها

دة شىء عادى اتعودت عليه

كنت لازم اقول الكلمتين دول

عشان الموضوع ميقفلش على الخيانه بين الزوج و زوجته

******************

انا كنت قلت انى حعد فترة غايبه عن البلوج أو المدونه

و اصدقائى المدونين

بس الحمد لله عندى وقت فاضى اهوه

و قلت احط بوست من زمان بفكر اكتبه بس مكنتش جايبه الاسلوب الصح او اللى سهل و سلس عشان اعرضه

رغم إن عندى صداع حااااااااااااااااااااااااااااااااد

بس الفكرة إن بالظبط من 5 ق

جالى حته خبر

طير الصداع من دماغى

و خلانى فى قمه السعادة

و سوف احتفظ بالخبر لنفسى

يمكن اكلمكم عن الخبر دة فى يوم من الايام

المهم دلوقتى

كل الناس اتكلمت عن الخيانه بمختلف المواضيع و الاشكال و يمكن انا مجبش جديد

بس انا حقول اللى عندى و انتوا ابقوا قولوا اللى عندكم

مدونتى تدعم حريه الرأى

بس اللى بيحبنا ميضربش نار (على رأى واحد صاحبنا)ههههههه

الخيانه كلمه كبيرة اوى اوى اوى

فى ناس ممكن تصنف الخيانه انواع

خيانه صديق خيانه حبيب

خيانه اخ

و فى ناس مش بتصنف الخيانه

لأن الخيانه واحدة فى جميع الاحوال

دة بيخون و دة بيخون و دة بيخون

نوع الخيانه عندى هو النوع التانى

إن الخيانه هى الخيانه مهما اختلف شكلها او نوعها

و دة اتفقت معايا صديقتى (ما محبه الا بعد عداوه ربنا ميجبش حاجه وحشه)العزيزة

TOYA

إن الخيانه واحدة فى جميع الاحوال

و غالبا بتيجى من ناس منتوقعش انها تخونا او تيجى علينا

ممكن لاننا منعرفهاش لدرجه انه تخدعنا

او إننا نعرفها لدرجه إن الواحد مش بيبقى مصدق إن الخيانه

جيه من البنى ادم دة

طب إزاى؟ معقوله

يبقى بنى ادم

كلت عيش و ملح معاه و يضربك فى ضهرك بكل بساطه

الخيانه ......الخيانه.......الخيانه

كلمه صعبه اوى

اوى فعلا

منقدرش نقولها على كل الناس

و منقدرش نمنعها عن كل الناس بردوه

دى مبقيتش كلمه صعبه و بس

دى بقه كلمه محيرة جدا

سمعتوا اغنيه الفنان الرائع كاظم الساهر

اتحبنى

بتقوله فى اول الاغنيه ايه

اتحبنى بعد الذى كان؟

يرد عليها

سأحبك رغم الذى كان

ماضيكى لا أنوى إثارته

حسبى بأنك ها هنا الان

تتبسمين

و تمسكين يدى

فيعود شكى فيكى ايمانا

احنى قبعتى لهذا العاشق

انا مكتبتش القصيده نحو صح

على اد لغتى

اصل انا ثقافتى فى النحو زى ثقافتى فى الفرنساوى بالظبط

ما علينا

اللى يفهم كلام الاغنيه دى

يا ريت يرد على سؤالى

لو انت مكانه؟

بلاش لو دى

إذا انت كنت مكانه

حتقدر تسامح من خانك

سواء

حبيب او صديق او قريب

حترجع ثقتك فيه زى الاول و احسن؟

انا حرد على سؤالى عشان محدش يزعل

كــــــــــــــــــــــــــــــــــــان زمــــــــــــــــــــــــــــــــــــــــان

ممكن اسامح

إنما دلوقتى محدش يستاهل

فئه نادره جدا جدا جدا جدا

اللى ممكن اسامحها

و دة اللى اتفقت معايا فيه

TOYA

مش اى حد دلوقتى يستاهل إننا نسامحه

عشان اللى بيخون حد او يضربه فى ضهره

بيبقى عارف هو بيعمل ايه كويس

و عارف معنى الخيانه

و عارف اللى بيعمله دة ايه و اد ايه حيأذى البنى ادم اللى قدامه

فالبنى ادم اللى زى دة ميستهلش إننا نسامحه

انا معرفش اكره

بس

مش حعامله زى ما أعامل حد عمره ما جه عليا او أذانى

و انا ححاطلكم الاغنيه لــــــــــــــ

على راى واحدة قالتهاله فى حفله من حفلاته

ارق وحش

كاظم الساهر_ اتحبنى

اللينك اهوه

http://www.2shared.com/file/3225581/a3c35f96/__online.html

و يا ريت بجد اعرف رائيكم ايه؟

انا عارفه إن اسلوبى المرة دى مش حلو اوى

بس عشان الربكه اللى انا فيها

و لما اخلص منها

ححاطلكم احلى صور لاحلى المخلوقات

الاطفال احباب الله

و ساعات بيبقوا مسهيين شوشو

و طالعين بداله

ههههههههههههههههههههههههههههه

متتاخروش فى الرد

و دمتـــــــــــــــــــــــــــــــــــــــــــــــــــــــــــــــــــــــم

كيفيه التعامل مع الاطفال المزعجين!!!! ابقوا قابلونى لو فلحتم

بوست جـــــــــــــــــــــــــــــــــــــــــــــــــــــــــــــامد جدا

حد عنده اعتراض ولا حاجه

يعنى لو حد عنده اعتراض يقول يعنى

الاختلاف فى الرأى لا يفسد للود قضيه

بس بجد مش ضحكتم

انا مش بدرس كدة و اللهى

بالعكس دة الاطفال احباب الله

و ساعات بيبقوا مسهيين شوشو

و طالعين بداله

هههههههههههههههههههههههه

و دى طبعا بعض الطرق المختلفه للتعامل معهم

حاضرا و مستقبلا

و عشان كل واحد ياخد احتياطاته بس

و يا رب يعجبكم

و دمتــــــــــــــــــــــــــــــــــم

تنويه هام

انا لما عملت المدونه او البلوج دة

كان بالنسبالى انى داخله عالم تانى

ممكن الواحد يتكلم فيه و يفضفض

مع ناس زيوه

ممكن تفهم هو عايز يقول ايهاو ممكن متفهمش عادى

و كل واحد يقول رائيه بصراحه

بعيد عن المقامات

يعنى البساط هنا المفروض

احمدى

و مفيش حاجه وحشه زى العالم اللى احنا عايشين فيه بره

لان العالم دة احنا اللى عاملينه بإيدينا

يعنى المفروض ان احنا نبعد عن السلبيات اللى عايشين فيها فى الواقع

و نحاول نخلى العالم التانى اللى بينا و بين بعض دة

احلى و افضل بكتير

و يبقى مختلف عن اى حته تانيه

انما بردوه

مفيش فايدة

الواحد يدخل على البلوج من دول

يلاقى شتيمه و قباحه و قله ادب

طب و على ايه

جى هنا ليه

تفرجنا على قله ادبك

خليك فى النيا اللى انت عايش فيها بره عن هنا

دى حاجه احنا عاملنها بإيدنا

و احنا الحاكمين ليها

مش حد معين

يبقى المفروض منسمحش لناس زى دول

مش عارفين يطلعوا الكبت القذر بتاعهم دة بره

يجوا هنا و يقرفونا بقه

كفايه عليكم الدنيا اللى انتم عايشين فيها

يا تبقوا موجودين بإحترامكم

يا إما احنا حنعرف نطردكم بره

لو فى كلمه انا قلتها غلط

حد يجى يقنعنى بالغلط دة

و دمتــــــــــــــــــــــــــــــــــــــــــــــــــــــــــــــــــــــــــــــــم

ابن ادم

البنى ادم دة عمره ما حيتغير ابدا

مهما حصله

عمرة ما حيتعلم من اللى حصله

و دة طبعك يابن ادم

عايش معاه

و حتموت معاه

قلبى عليك يا بن ادم

تاعب نفسك اوى

و عمال تهرب تهرب

من حاجه حصلت بايدك

قلبى عليك

و دمتـــــــــــــــــــــــــــــــــــــــــــــــــــــــــــــــــــــــــــــم

الفلانتيييين بكسر التاااااااااء

امممممممممممممممممم

دباديب كتييييييييييييييييييييييييييييييييييييييييييييير اوى اوى اوى يا جدعان

و اللون الاحمر مالى البلد

قلت الله دة الشعب المصرى اصيل فعلا

كل دة عشان المنتخب بتاعنا جاب الكاس يسلام يا ولاد

يا حلاوة يا حلاوة

المهم روحت على المكتبه اللى بحبه عشان اروح ارجع كتاب كنت مستعيراه

و قلت ارجعه قبل ما يقيم الراجل عليا الحد

اصدى يدفعنى غرامه تاخير

مع انى المفروض اخد الكتاب اسبوع بس هو قالى هاتيه بدرى

فانا قلت ابقى اد كلمتى يعنى و اجيبها زى ما اتفقنا

المهم دخلت و انا شايله بقه بصل و طماطم و موز

و انا عمرى ما روحت بالشكل دة

بس انا قلت بردوه التغيير مطلوب

قولتله اتفضل

و قولتله على رقم صفحتى الى بيكتب فيها رقم الكتاب اللى باخدوه

و قالى كدة مظبوط

قلتله و الباقى فى ميعادهم بقه انا جيبتلك دة بس عشان انا قلت حجيبه النهاردة

قالى ماشى

و بعدين راح قايلى كلمه كدة

هابى فلانتييييييييييييييييييييييييييين بكسر التاء

قلتله

نعم

قالى هابى فلانتيييييييييييييييييييييييييييين

اتجمعت المشاهد كلها فى دماغى

الدباديب و الورد و كل الحمار دة و البنات كلها نازله متلمعه

رديت عليه و قولتله ماليش فيه

فبيقولى ها؟

قولتله ماليش فيه سلامو عليكو

و خدت البصل و الطماطم و المووووووووووووز بتاعى و مشيت

و دمتـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــم

بعض من اليابانيه مش بعض ما عندكم

بم انى اعشق اليابانيه و الحياه اليابانيه البسيطه و مع ذلك لا افقه غير 4 او 5 كلمات باليابانيه لذلك فقد بحثت و تفحصت و وجدت بعض الكلمات العربيه و معناها باللغه اليابانيه و النطق و الكلمه و لكنى لن اضع كل ما وجدت غتــــــــــــــاته ممكن يعنى. و لكنى سوف اضع بعض الاشياء المشوقه و انتظر تعليقاتكم اذا كان ما وضعته لفت الانتباه ام ينبغى رميه فى اول علبه اونيكس عادى يعنى . و دمتـــــــــــــــــم

الكلمة بالعربي...........النطق بالياباني

صباح الخير...................أوهايو(ohaio)

مساء الخير...................كومبانوا(conbanwa)

مرحبا........................كون نيتشوا(con nethiwa)

تهانينا......................أمديتوو(omdetwa)

تصبح على خير.................أوياسمي(oyasmee)

كيف الحال؟...................كنكيدسكا(conkidska)

الاعتذار

آسف.........................كومناساي(comenasai)

عفوا........................سمماسن(sememasen)

لا أستطيع....................ديه كي ماسن(de ke masn)

لا أرغب......................إيليماسن(eli masn)

الشكر

شكرا.......................أريغاتو(ari gato)

الحمد لله....................اوكا**اماديه(okagisma madih)

حسنا.......................كه كوودس(ki kodes)

أنت لطيف...................أناتوا شين ستسدس(anatwa shin stsdes)

كفايه كدة عليكوا لحد ما اشوف عملت اضافه كويسه و لا اروح اولع فى الجزمه انا عندى روح رياضيه