العفاريت

خلصت الامتحانات و قلت بقه ادور على حاجه اقضى الصيف فيها بس تكون مفيدة من جميع الجهات

فلاقيت شغل

ايه بقه الشغل

مدرسه رياض اطفال فى نادى سموحه

ازاى مدرسه فى نادى

حقولكم بس اصبروا عليا

انا ماسكه فصل

من اقوى فئات العفاريت على وجه الارض

فصل الاربع سنين

يا ربنا

مش ممكن

عفاريت فعلا

المفروض ان معايا مدرسه كمان

بس مفيش ولا واحده قدرت تستحمل الفصل دة

بس على مين

انا لوحدى الحمد لله يعنى

اتقدمت فيه على اد مقدر

و بدأ يتعلم النظام

المفروض انى بدى الفصل دة فنى يعنى اعمال فنيه و يدويه غير الرسم طبعا

و بدى بقيه الفصول نفس الحاجه

و حنزل حمام السباحه و اعلمهم سباحه

و الاخت لسه غارقه الصيف اللى فات فى البحر

كله دة كوم

و عندى حته واد فى الفصل عنيد بشكل

و يعتبر قليل الادب

اخر عاركه بينى و بينه

ضربنى و عضنى و شدنى من الطرحه و شتمنى و قالى يا وحشه يا معفنه

شكله مفكرنى مش بستحمى ولا ايه

محدش يعنى سألنى وقالى ليه كل دة؟

انتى حتعملى عقلك بعقل طفل صغير

اقولكم لا طبعا و اقول اللى حصل

المفروض انهم كاناو بيلعبوا بالمراجيح فى الشمس

فعطشوا جامد

طبعا غلط جدا و جسمهم لسه سخن من اللعب انهم يشربوا

فقولتلهم نروح الفصل نغسل ايدينا و وشنا و نشرب براحتنا

عشان يكون عرقهم نشف عشان ميتعبوش

انما بقه الباشا حسين

يقولى لا

عايز اشرب

و يسيبنى و يطلع يجرى على الكافتيريا فى النادى

على مين

طلعت جريت وراه و مسكته

و شديته و رجعت تانى

و انا ماسكاه وقفت الفصل طابور و خليت الدادا تطلع بيهم على الفصل و انا راجعه لوحدة بحسين

يا لهوى على المجزرة اللى حاصله

ضرب و ينام فى الارض و يحاول يعضنى

و انا ماسكاه من دراعاته الاتنين و مش قادر يفلفص منى

يعمل ايه بقه هو عشان انا ممشيش

يلف رجليه الاتنين حوالين رجلى عشان ممشيش

فقولتله انت مفكرنى كدة مش حعرف امشى

فبقيت امشى و هو مكلبش فى رجلى

يا عينى الواد بقه مش قادر عليا

و فضل يعيط و يصوت و يدبدب فى الارض

و انا ماشيه برضه ولا هاممنى

لحد لاقيته بيقولى

انا تعبت

قولتلها ايه تعبت طيب اشيلك يا حسين

قالى اة

فشيلته و روحت على الفصل

قعد يعيط شويه

و بعدين قولتلها ها عايز تشرب

قالى لا لسه مغسلتش ايدى و وشى

قولتله طيب

يلا روح مع الدادا

بس

رجع شربته و قعدت اتكلمت معاه

و قالى انا اسف

بس طبعا كان لازم اقول لمامته عشان يعرف ان مش كل مرة تسلم الجره

و مامته عارفه ان ابنها معاملته صعبه

هو مش عنيد

بس هو يوم لما دخل الروضه

لما المدرسه تطلب منه يعمل حاجه و ميرضاش

كانت بتضربه عشان يعملها

فهو اتعلم

ان لو هو كان عايز حاجه من حد و مرضاش لازم يضربه عشان يرضى

عشان كدة انا مرديتش اضربه

عشان يتعلم ان مش كل حاجه بالضرب

و ان هو لما سمع الكلام الحاجه اللى عايزها عملتهاله

بس طبعا مش ممكن سلوكه يتعدل من مرة واحده

بس عايزة اقول انى روحت دراعى بيوجعنى جدا

و ركبتى الاتنين فى قمه الالم

من كتر جره لحد الفصل

دة غير بقيه العفاريت

و لسه فى حكايات كتير جدا على الشغل المهبب الى اشتغلته

و ربنا يقدرنى على فعل الخير

هههههههههههههههههههههههه

و لينا عوده إن شاء الله

و دمتـــــــــــــــــــــــــــــــــــــــــــــــــم